الحمد لله رب العالمين انا فرحانة أوي النهاردة - يارب دايمًا - أصلي صليت النهاردة التروايح في المسجد اللي حاكتب فيه كتابي إن شاء الله تعالى - يوم 25/10- وسبحان الله صليت في قاعة المناسبات اللي حاعمل فيها الفرح - أصلي حاعمل كتب الكتاب والزفاف في نفس اليوم إن شاء الله - بجد كنت فرحانة أوي على الرغم من إني كنت مزمزئة شويتين من فكرة اني اعمل فرحي في المسجد خاصة إني ماعملتش خطوبة لظروف عائلية لكن النهاردة سبحان الله حسيت بفرحة وارتياح عجيب وانا بصلي في القاعة وحسيت انا ربنا بيحبني أوي لأنه من عليا أني أبدأ حياتي الجديدة من المسجد وما أبدأهاش بمعاصي الحمد لله رب العالمين
يارب لك الحمد كما ينبغي لجلال وجهك وعظيم سلطانك
بجد كنت مبسوطة وفرحانة أوي أوي ونفسي الأيام تجري وأحضر فرحي ههههههههه في المسجد وأنا لابسة الفستان الأبيض اللي نقيته من بيت مليون فستان علشان اليوم ده.
واللي فرحني أكتر أني كلمت حبيبي بعد ما روحت وحسيت بحنية ودفئ جميل في صوته وهو بيكلمني وبيقولي انا عايزك تستنيني في البيت لما نتجوز وانا راجع من الشغل نفسي أشوفك وانتي مستنية جوزك وهو راجع من الشغل وانتي قاعدة في البيت ههههههه قلتله حاضر ابقا أخدلك أجازة من شغلي علشان أوريلك شكلي وانا مستنياك يا سي السيد وانت راجع من الشغل بطبق المية بملح بس أنت عارف .. حاتكون أحلى سي السيد في الدنيا
ربنا يسعد أيامنا يارب ويباركلنا ويبارك علينا ويجمع بيننا في خير
اللهم بارك لنا وبارك علينا واجمع بيننا في خير يارب العالمين